"Соңына дейін барамын". Қазақстандық файтер қыздың UFC-дегі алғашқы жеңілісінен кейінгі мәлімдемесі

Қазақстандық спортшы Мария Агапова UFC ұйымындағы Шона Добсоннан жеңілген кездесу туралы ойымен бөлісті. Бұл отандасымыздың бұл ұйымдағы бірінші жеңілісі еді. 

Жеңіл салмақтағы бұл кездесу АҚШ-тың Лас-Вегас қаласында UFC on ESPN 15 турнирінде өтіп, америкалық спортшының жеңісімен аяқталды. Ол екінші раундта қазақстандық спортшының қарқынын басып, техникалық нокаутпен жеңіске жетті. Бұл UFC тарихындағы күтпеген нәтижелердің бірі болып тіркелді. Ал кездесуден кейін Агапова бірден емханаға кетті. 

Агапованың айтуынша, ол Добсонмен өткен бұл кездесуді жеңіліс деп емес, сабақ деп қарайды екен. "Бұл қызықты кеш болды. Мен екінші раундқа дейін расымен жақсы көңіл көтердім. Менің жанармайым таусылып, төреші күтпеген жерден кездесуде тоқтатпағанша барлығы жақсы болды. 

Мен мұны жеңіліс деп есептемеймін. Жеңіліс деп адамның өзіңнің арманыңнан бас тартқан кезді айтуға болады. Мен үшін бұл сабақ. Тәжірибе. Менің жолым енді ғана басталып жатыр. Қолдау көрсеткендеріңіз үшін барлықтарыңызға рақмет! Мықты болып қайта ораламын. Мен әрдайым соңына дейін барамын", - деп жазды Агапова Instagram парақшасында. 



Еске салайық, Агапова UFC ұйымында 13 маусым күні Лас-Вегастағы UFC Fight Night 172 турнирінде бірінші кездесуін өткізіп, америкалық Ханна Сайферстен үстем түскен еді.