UFC-де өнер көрсететін жеңілмеген қазақстандық Шавкат Рахмоновтың (19-0) командасы Dar Team 2025 жылға мақсатын айтты, деп хабарлайды Vesti.kz.
Әлеуметтік желілерде жарияланған бейнероликте Рахмоновтың қатысуымен қысқа, бірақ, нақты мәлімдеме жасалды:
"Мақсат өзгермейді - 2025", - деп жазды Dar Team, титул эмодзисін қоса бекітіп.
Осылайша, Шавкаттың лагері спортшы тап болған қиындықтарға қарамастан, биыл жартылай орта салмақтағы UFC чемпионы атану басты мақсат болып отырғанын тағы растады.
Рахмонов 2024 жылдың желтоқсанынан бері октагонға шықпады. Ол кезде Шавкат UFC 310 турнирінде ирландиялық Иэн Гэрриді (16–1) ауыр жекпе-жекте жеңіп, жарақат алғанына қарамастан ерік-жігер танытып, чемпиондық белбеуге басты үміткер ретіндегі орнын нықтай түсті.
Бастапқыда Рахмонов 2025 жылдың мамырында өтетін UFC 315 турнирінде сол кездегі чемпион Белал Мухаммедпен (24–4) кездесуі тиіс еді. Алайда жарақатына байланысты бұл кездесуден бас тартуға мәжбүр болды. Оның орнына октагонға шыққан аустралиялық Джек Делла Маддалена (18-2) мүмкіндікті тиімді пайдаланып, жартылай орта салмақтағы чемпиондық белбеуді жеңіп алды.
Жарнама