Қуат "Найман" Хамитов жарақаттары туралы айтып осы жылы іске асыратын жоспаларымен бөлісті

Ережесіз жекпе-жекте ел намысын қорғайтын Қуат "Найман" Хамитов Ләйлә Сұлтанқызы жүргізетін "The Эфир" жобасында алдағы жоспарларымен бөлісті. 

"Көктемнің бірінші айында Бразилияның Рио-де-Жанейро қаласында үлкен жекпе-жек кеші өтеді. Сол жерде өнер көрсетсем деген ниетім бар.

Білесіздер, соңғы кездесуімді ирландиялық Питер Куиллиге қарсы өткізген едім. Енді сол жігіт мені екінші жекпе-жекке шақырып жатыр. Кездесу Ирландияның Дублин қаласында қыркүйек айында өтеді. Кештің басты жекпе-жегі болады. Сонда өнер көрсету ойда бар. 

Содан соң қазір Арменияда Давид Хачетерян деген танымал спортшысы наурыз айының аяғында өз елінде жекпе-жек өткізеді. Мен сол жігітпен кездескім келеді. 2018 жылы жарақаттарым кедергі келтірмесе, осы үш кездесуді өткізгім келеді", - дейді "Найман". 

Сонымен қатар отандасымыз спорттық карьерасында алып қалған жарақаттары туралы да айтып берді. 

"Тайланд елінде менің әлемнің түкпір-түкпірінен келген достарым дайындық өткізеді. Солармен бір дастарханда отырған кезде мен олардан - "Сендердің қай жерлерің ауырмайды осы", - деп сұрағаным бар еді. "Еш жеріміміз ауырмайды, ал сенің қай жерің ауырады", - деп айтты. Сонда мен "сол қолым ғана ауырмайды", - деп жауап бердім. Өйткені, денемнің барлық жерінде жарақат бар. Қолым ауырады, мұрным төрт рет сынған, мойнымнан жарақат алғам, белім ауырады. Жекпе-жекке шыққан кезде тобығымды орап шығамын. Себебі, ұстамайды. Қарсыласым көрмес үшін осылай істеймін. Айта берсе барлық жерімде жарақатым бар", - дейді Хамитов. 

Еске салайық, Хамитов соңғы жекпе-жегін 27 қараша күні ирландиялық спортшы Питер Куиллиге қарсы өткізіп, басында жеңіске жеткен еді.  Осылайша 29 жастағы спортшымыз мансабындағы 19 (14 уақытынан бұрын) жеңісіне жетті. Хамитовтың еншісінде 6 жеңіліс бар. Ал 31 жастағы Куилли болса карьерасындағы бесінші жеңілісіне тап болды. 10 жекпе-жекте ол жеңіске жеткен. Бірақ кейін АСВ ұйымының тәуелсіз төрешілер жекпе-жекті тең деп тіркеді.