36 жастағы қазақстандық файтер Николай Веретенников (14-8) өткен демалыста UFC-дегі алтыншы жекпе-жегінің төртеуінде жеңіліс тапты. Жартылай орта салмақта өнер көрсететін спортшы америкалық Хаос Уильямспен (16-5) айқастың бірінші раундында техникалық нокаутқа түсіп қалды, деп хабарлайды Vesti.kz.
Жекпе-жек үш минутқа жетпей аяқталды
Николай Веретенников пен 32 жастағы америкалық Хаос Уильямс арасындағы кездесу UFC турнирі аясында АҚШ-тың Лас-Вегас қаласында өтті.
Алдын ала кардтағы айқас небәрі үш минут 31 секундқа созылды. Төреші қазақстандық спортшы ауыр соққылар өткізіп жатқанын байқап, жекпе-жекті тоқтатуға мәжбүр болды.
Осылайша, Веретенниковтың UFC-дегі көрсеткіші екі жеңіс және төрт жеңіліске жетті.
Антирекорд жасап отыр
Бұл - Николай Веретенниковнің UFC-дегі техникалық нокаутпен екінші рет жеңілуі. Бұған дейін 2025 жылдың ақпанында ол Остин Вандерфордқа қарсы кездесуде де мерзімінен бұрын жеңілген еді.
Осылайша, Веретенников UFC тарихында екі рет нокаутпен жеңілген алғашқы қазақстандық файтер атанды.
Бұған дейін UFC-де бір реттен нокаутпен жеңілген қазақстандықтар қатарында Мария Агапова, Жалғас Жұмағұлов және Асу Алмабаев болған.
Қазір олардың ішінде тек Асу Алмабаев қана UFC-де өнер көрсетуді жалғастырып жатыр.
Веретенниковтың белсенділігі ерекше атап өтілді
Дегенмен, Веретенниковтың көрсеткішінде оң тұстар да бар. 36 жастағы файтер өзге қазақстандық спортшылармен салыстырғанда UFC-де өте белсенді өнер көрсетіп жүр. Ол UFC-дегі дебютін 2024 жылдың тамызында өткізді және арада екі жылға жетпейтін уақытта алты жекпе-жекке шығып үлгерді.
Көп жағдайда Веретенников қысқа мерзімді шақыртумен немесе соңғы сәтте қарсылас ауыстырылған кезде октагонға шығады. Оның АҚШ-та тұруы бұл тұрғыда артықшылық береді.
Алайда мұндай шұғыл дайындық кейде нәтиже мен физикалық қалыпқа кері әсерін тигізіп жатады.
Қазақстандықтардың жеңісті сериясы үзілді
Бұл жеңіліс қазақстандық файтерлердің UFC-дегі үш жеңістен тұрған сериясын тоқтатты. Негізі қатарынан төрт жеңіс болған, алайда Алиби Идристің соңғы жекпе-жегінің нәтижесі допингке байланысты жойылған еді.
Айта кетейік, сол серияның ішінде Веретенниковтың ақпандағы жеңісі де болған.
Қазақстандық спортшылардың UFC-дегі келесі жекпе-жектері келесі айдың соңында өтеді. 27 маусым күні Баку қаласында Асу Алмабаев пен Бекзат Алмахан октагонға шығады. Асу америкалық Чарльз Джонсонмен (19-8) кездессе, Бекзат Жан Мацумотомен (17-2) күш сынасады.
Жарнама