Қазақстандық файтер Асу Алмабаевтың бапкері Эдуард Базров шәкіртінің UFC-дегі келесі жекпе-жегінің уақытын айтты. Осылай 31 жастағы спортшының октагонға қашан қайта оралатыны белгілі болды, деп хабарлайды Vesti.kz Sport Plus басылымына сілтеме жасап.
"Біз үшін бастысы - UFC. Қараша айында жекпе-жек өткізуге дайындалып жатырмыз. Жалпы, Асу алдыңғы айқасынан кейін бірден жаттығуға кірісті, кейін ұсыныс түсті. Алдымен Тбилисиде өткіземіз деп ойлағанбыз, кейін Америкаға бару ұсынылды. Біз үшін оның айырмашылығы жоқ. Еркін күрес пен грэпплингтен өтетін жекпе-жектер - ол үшін жаңа тәжірибе.
Қазір мен онымен бірге АҚШ-қа шәкіртім, әлем чемпионатының жүлдегері Асылжан Есенгелдіні жібердім. Олар Америкаға 10 күнге барып, жаттығады, балуандармен бірге жұмыс істейді, Нью-Йоркті аралайды. Асу тәжірибе жинап, ақша табады. Оның үстіне, оның отбасы үлкен, бес баласы бар, оларды асырау керек. Ал лига жаман ақша ұсынбайды.
Америкадан оралған соң, екеуміз Ыстамбұлға ACB JJ турниріне ұшамыз. Ол лига белбеуі үшін күреседі. Әрине, жеңу үшін күресеміз, бірақ бар күшін салып, тәуекелге бармайды. Мен оған: егер қауіпті жағдай туындаса, беріл, тәуекел етпе, дедім. Қалай болғанда да, біздің басты мақсатымыз өзгермейді - UFC белбеуін жеңіп алу және оны Қазақстанға мүмкіндігінше тезірек әкелу.
Әзірге 21 қарашада Катарда өтетін турнирге дайындалып жатырмыз. Алла қаласа, жақын арада қарсыласы да белгілі болады. Ройвал бұл күнге жекпе-жек өткізгісі келмейтін сияқты, сондықтан кіммен шығатынын күтіп отырмыз. Осылайша, Асу алдымен осы екі жекпе-жегін өткізеді, содан кейін октагонға оралуға дайындықты бастаймыз", - деді бапкер.