Ресейлік файтер Александр Емельянко Instagram желісіндегі парақшасында Шешенстан басшысы Рамзан Қадыровпен жұдырықтасайын деп жатқаны туралы бейнеролик жариялады, - деп хабарлайды Tengrinews.kz тілшісі.
"Әрине, жұдырықтасамыз, біз чемпионбыз ғой. Мен және Александр, біз - чемпионбыз. Бірақ біз әлі арамызда кім чемпион екенін анықтауымыз керек. Бұл туралы хабардар боласыздар", - дейді Қадыров.
Айта кетейік, Емельянко Грозныйда Магомед Исмаиловқа қарсы жекпе-жекке дайындалып жатыр. Ол ACA 107 турнирі аясында өтеді.
Бұған дейін Рамзан Қадыров Емельянконы Instagram желісіндегі парақшасында видео үндеу жариялап, жекпе-жекке шақырған. Видеода Шешенстан басшысы жекпе-жек өткізуге дайын екенін айтқан.