Дүниежүзілік бокс ұйымы (WBO) барлық салмақ дәрежелері бойынша жаңартылған рейтингін жариялап, қазақстандық боксшы Жәнібек Әлімханұлының (17-0, 12 КО) мәртебесін растады, деп хабарлайды Vesti.kz.
Жуырда дисквалификацияға ұшырағанына қарамастан, Әлімханұлы орта салмақта WBO нұсқасы бойынша әлем чемпионы болып қала берді. Еске салайық, ақпан айында ұйым оны допинг сынамасынан оң нәтиже шыққаны үшін бір жылға — 2026 жылдың 2 желтоқсанына дейін жарыстардан шеттеткен болатын. Алайда титулдан айыру туралы шешім қабылданған жоқ.
Осылайша, сын-пікірлерге қарамастан, WBO өз ұстанымын өзгертпей, қазақстандық боксшының чемпиондық белбеуін сақтап қалғанын ресми түрде растады.
Айта кетейік, Әлімханұлы IBF нұсқасы бойынша да әлем чемпионы. Дегенмен Халықаралық бокс федерациясы әзірге бұл жағдайға қатысты ресми мәлімдеме жасаған жоқ.
WBO-ның жаңартылған рейтингінде Қазақстанның тағы бір өкіліне қатысты өзгеріс болды. Али Ахмедов (25-2, 17 КО) екінші орта салмақта бір сатыға жоғарылап, дивизионның үздік 15 боксшысы тізімінде енді 14-ші тұр.
Жарнама