Орта салмақта WBC-дің уақытша чемпионы атағына айқасатын қазақстандық боксшы Мейірім Нұрсұлтановқа (20-0, 11 КО) қатысты маңызды жаңалық жария етілді, деп хабарлайды Vesti.kz.
Адамес қазақстандықтан қаша алмайды
Бұған дейін хабарланғандай, егер қазақстандық боксшы америкалық Хесус Рамосты (24-1, 19 КО) жеңсе, оның келесі қарсыласы WBC чемпионы доминиканалық Карлос Адамес (25-1-1, 18 КО) болуы мүмкін.
Нұрсұлтанов пен Рамос арасындағы жекпе-жек 19 қыркүйекте өтеді. Бұл кездесудің жеңімпазы орта салмақтағы WBC титулына міндетті үміткер мәртебесін алады.
Алайда бұған дейін Адамес титулын міндетті қорғау жекпе-жегін бірнеше рет кейінге шегерген. Сонымен қатар ол өзге қазақстандық боксшы Жәнібек Әлімханұлымен (17-0, 12 КО) жекпе-жек өткізуден де жалтарған болатын.
Дегенмен белгілі инсайдер Дэн Рафаэльдің хабарлауынша, доминикандық боксшыға аралық жекпе-жек өткізуге тыйым салынған. Бұл чемпионның титулын міндетті қорғау жекпе-жегіне дейін басқа кездесуге шыға алмайтынын білдіреді.
Осылайша, Рамосты жеңген жағдайда Нұрсұлтанов бірден Адамеске қарсы толыққанды чемпиондық жекпе-жек өткізу мүмкіндігіне ие болады. Қазақстандық боксшы үшін бұл кәсіпқой карьерасындағы WBC-дің басты титулы үшін күресуге берілген алғашқы мүмкіндік болуы ықтимал.
Нұрсұлтанов ұзақ үзілістен кейін оралады
Алдағы жекпе-жек 32 жастағы қазақстандық боксшы үшін ұзақ үзілістен кейінгі оралу болады. Нұрсұлтанов соңғы рет 2023 жылы Ташкентте шаршы алаңға шыққан. Сол кезде ол чилилік Хулио Аламосты (16-3, 9 КО) төрешілердің ортақ шешімімен жеңді.
Нұрсұлтанов кәсіпқой карьерасында әлі жеңілген жоқ. Оның еншісінде қазір 20 жеңіс бар (11 нокаут).
Рамос та жекпе-жекке жеңіспен келіп отыр. Былтыр желтоқсанда америкалық боксшы Сан-Антониода шаршы алаңға шығып, отандасы Шейн Мозлиді (23-5, 13 КО) төрешілер шешімімен жеңген.
Жарнама