Орта салмақта IBF және WBO чемпионы Жәнібек Әлімханұлы (17-0, 12 KO) жыл соңына дейін титулды айқас өткізеді, деп хабарлайды Vesti.kz.
Жәнібек Әлімханұлы үшінші белбеу үшін жекпе-жек өткізеді
Бұған дейін белгілі инсайдер Жәнібектің 6 желтоқсанда АҚШ-тың Техас штатындағы Сан-Антонио қаласында жекпе-жек өткізетінін хабарлаған еді. Ал қарсыласы WBA тұжырымы бойынша чемпион кубалық Эрисланди Лара (31-3-3, 19 КО) болу керек.
Енді бұл ақпаратты беделді The Ring журналы да растады, чемпиондар белбеу біріктіру үшін рингте кездеседі.
Жекпе-жек орта салмақтағы (72,5 кг дейін) лимитте өтеді. Ол PBC ұйымы ұйымдастыратын бокс кешінің андеркартында ұйымдастырылады. Ал кештің басты оқиғасы мексикалық Исаак Крус (27-3-1, 18 КО) пен америкалық Ламонт Роуч (25-1-2, 10 КО) арасындағы кездесу болмақ.
Чемпиондардың кейінгі айқастары
Жәнібек Әлімханұлы сәуір айында Астанада өткен кейінгі жекпе-жегінде франциялық Ануэль Нгамиссенгені (14-1, 9 КО) бесінші раундта нокаутпен жеңіп, чемпиондық белбеулерін сәтті қорғады.
2022 жылдан бері чемпиондық белбеудің иесі болып келе жатқан 32 жастағы Жәнібек үшін алдағы кездесу маңызды сынақ болмақ.
Ал 42 жастағы Эрисланди Лара қазіргі уақытта бокстағы ең егде жастағы әлем чемпионы саналады. Өткен жылдың қыркүйегінде ол америкалық Дэнни Гарсияны (37-4, 21 КО) нокаутқа түсіріп, қатарынан төртінші рет қарсыласын мерзімінен бұрын жеңді.
Лара Канеломен жұдырықтасқан – енді Жәнібекпен күш сынасады
Кубалық боксшының қарсыластары қатарында әйгілі Сауль Канело Альварес (63-3-2, 39 КО) те бар. Екі боксшы 2014 жылы 12 раундтық тартысты кездесу өткізген. Ол кезде төрешілер шешімімен жеңіс мексикалық боксшыға бұйырған еді.
Жарнама