"Тек жеңуге шығамын!". Қазақстандық нокаутшы 16 боксшыны сұлатқан қарсыласпен айқас туралы

Бірінші орта салмақтағы қазақстандық Батыр Жүкембаев (18-0, 14 КО) Vesti.kz тілшісіне берген сұхбатында пуэрториколық Сабриэль Матиасқа (16-1, 16 КО) қарсы жекпе-жекке дайындығы туралы айтып берді.

Бұл айқас 29 мамыр Лос-Анджелестегі бос кешінде өтеді. Батыр үшін бұл АҚШ жеріндегі бірінші жекпе-жек.

"Жаттығу қарқынды жүріп жатыр. Бұл айқасқа бапкерім Мэни Роблеспен өзгеше келіп отырмыз. Стратегия мен сараптама, нақты жоспар ұстанып отырмыз, 29 мамыр рингке бабымда шығамын. Соққы техникасына қосымша күш салып жатырмыз. АҚШ-қа қазақстандық бапкер Қанат Алтаевты шақырдым. Сосын Мадияр Әшкеев функционалды дайындығыма көмектесіп, тәжірибесімен бөлісіп жатыр. Менімен бірге бүкіл Қазақстан мұқым Пуэрто-Рикаға қарсы шығуға дайындалып жатқандай. 

Көптеген қазақстандықтар қолдау білдіріп жазып жатыр, бұл қанаттандырады. Бұл жекпе-жек АҚШ пен әлемде қызу талқыланып жатқандықтан жаһандық сипат алып келеді. Әрине, Сабриэль Матиас - карьерамдағы мықты қарсылас, бірақ, ол мен сияқты боксшымен кезігіп көрген емес. IBF рейтингінде бекер жүрген жоқпын және осы деңгейде жұдырықтасуға лайықтымын. Жанкүйерлерге бұл күні тамаша айқас сыйлаймыз, ИншаАлла рингке тек жеңіс үшін шығамын", - дейді Батыр.