Екінші орта салмақта әлемнің бұрынғы абсолют чемпионы Сауль Канело Альварес Египеттегі бокс кешінде қазақстандық Геннадий GGG Головкинмен кездесуі туралы айтып берді, деп хабарлайды Vesti.kz.
2026 жылдың 23-24 мамырына қараған түні Гизада өткен ірі бокс шоуында екі аңыз боксшы да құрметті қонақ болды. Кештің басты жекпе-жегінде Александр Усик пен Рико Верхувен кездесіп, жеңісті украиналық чемпион иеленді.
Головкин мен Канело ринг маңында отырып жекпе-жектерді тамашалап, өзара әңгімелесіп, камера алдында бірге суретке түсті.
Канело кездесудің достық атмосферада өткенін айтып, олардың кәсіпқой рингтегі трилогиясын еске алды.
Головкиннің рингке оралуы туралы"Біз Геннадиймен түрлі оқиғаларды еске алдық. Арамызда үш керемет жекпе-жек өтті. Біз бір рингте жұдырықтастық, сондықтан талқылайтын дүниеміз болды", - деді Канело күлімсіреп.
Журналистер мексикалықтан Геннадий Головкиннің кәсіпқой боксқа қайта оралу ықтималдығы туралы да сұрады.
"Ол қалаған нәрсесін жасай алады. Меніңше, ол өзіне ұнайтын жолды таңдауға лайық. Егер қайта оралып, тағы бір жекпе-жек өткізсе, бұл жақсы болады", - деді мексикалық боксшы.
Геннадий Головкин мен Сауль Альварес кәсіби рингте үш рет кездескен:
2017 жылы алғашқы жекпе-жек даулы тең нәтижемен аяқталды;
2018 жылы Канело төрешілердің басым даусымен жеңіске жетті;
2022 жылы мексикалық боксшы тағы да басым түсіп, бірауыздан қабылданған шешіммен жеңді.
Содан бері Геннадий Головкин кәсіпқой рингке шыққан жоқ, бірақ мансабын ресми түрде аяқтағанын жарияламады. Қазіргі уақытта ол Қазақстан Ұлттық Олимпиада комитетінің президенті қызметін атқарады, сондай-ақ, World Boxing халықаралық ұйымын басқарады.
Ал Сауль Альварес кәсіпқой бокстағы мансабын жалғастыруда. Оның келесі жекпе-жегі биылғы қыркүйек айына жоспарланған.