Сауль Альварестің бапкері Головкинмен үшінші жекпе-жектің нақты уақытын айтты

Төрт салмақта әлем чемпионы мексикалық Сауль "Канело" Альварестің (53-2-1, 36 КО) бапкері Эдди Рейносо Box Azteca арнасына берген сұхбатында биылғы жоспарлары туралы айтып берді, - деп хабарлайды Vesti.kz.

Оның сөзінше, биыл "Канело" екі жекпе-жек өткізеді, оның бірі титулдар біріктіретін кездесу екен. 

"Биыл шынымен екі кездесу өткізгіміз келеді. Мамырда жекпе-жекке шыға алмадық, бірақ, енді қыркүйек пен желтоқсанда жасауға тырысамыз. Иә, біз әлі де Билли Джо Сондерсті айтып отырмыз. 

Сондай-ақ, бізде Калеб Плант пен WBC чемпионы Дэвид Бенавидес бар. Бірнеше вариант шығып тұр. Головкинмен жекпе-жек тек желтоқсанда, өйткені, оның адамдары GGG Шереметаны жеңбей, "Канеломен" жұдырықтаспайтынын айтты", - дейді Рейносо.