"Пиар-қадам". Бокс федерациясы Хаммер мен Шарипованың Қазақстан атынан Олимпиадаға қатысуы туралы

Кристина Хаммер және Фируза Шарипова. : Vesti.kz коллажы

ҚР Кәсіпқой бокс федерациясының вице-президенті Виктор Демьяненко Vesti.kz тілшісіне Фируза Шарипованың (9-1, 4 КО) Олимпиадаға Қазақстан атынан бармақ ниетте екеніне қатысты ойын білдірді. Сонымен қатар, орта салмақта WBO чемпионы Кристина Хаммер де осындай мәлімдеме жасаған. Хаммер Қазақстан тумасы, алайда, қазіргі таңда Германия атынан жұдырықтасады.

"Хаммер мен Шарипова Қазақстан атынан Олимпиадаға қатысқысы келеді деген - пиар-қадам деп ойлаймын. Олар ел құрамасына қалай ілінбек екенін түсінбедім. Құраманы аға жаттықтырушы таңдайды, ал оның Олимпиадаға қатысты өз көзқарасы бар. Республикалық іріктеуден қалай өтпек?

Оның үстіне әуесқой боксты Олимпиада бағдарламасына қалдыру мәселесі әлі шешілген жоқ. Қала ма, қалдырса қандай күйде, бұл кейін белгілі болады. Сондықтан бұл мәлімдемелерге назар аудармаған жөн деп ойлаймын", - дейді Демьяненко.

Айта кетейік, 24 жастағы Шарипова кәсіпқой рингте алғаш 2016 жылдың 21 мамырында жұдырықтасты. Содан бері он жекпе-жек өткізіп, тоғызында жеңіске жетті және бір рет жеңілді. Қазіргі таңда ол екінші орта салмақта IBO және жеңіл дививзионда WIBA, WBU белбеулеріне ие.

28 жастағы Хаммер Қарағанды облысындағы Новодолинка ауылында дүниеге келген. Бала кезінде ата-анасы Германияға көшіп, қазір Дортмунд қаласында тұрады. Кәсіпқой боксқа Хаммер 2009 жылы ауысты, ал бір жыл өте, 20 жасында WBO белбеуін жеңіп алды. Тоғыз жылда ол үш салмақта чемпион болды.

Әлеуметтік желілерде бөлісу