MTK GLOBAL KAZAKHSTAN елімізде қарқынды дамып келе жатқан менеджерлік компаниялардың бірі. TUKESHOV BOXING PROMOTION промоутерлік компаниясымен бірге 2019-шы жылдан бері қазақ жерінде 20-дан астам бокс кешін ұйымдастырған. Осы уақыт аралығында 250-ге тарта отандық былғары қолғап шебері өнер көрсетті.
Олардың арасында Сұлтан Заурбек, Виктор Коточигов, Қамшыбек Қоңқабаев, Тұрсынбай Құлахмет және Нұртас Әжбенов сынды тәжірибелі спортшылар Бүкіл әлемдік бокс кеңесі (WBC) және Бүкіләлемдік бокс ұйымының (WBO) белбеулерін иеленіп үлгерді. Қазақстандық боксшылардың кездесулерін отандық арналардан бөлек АҚШ-тың белгілі ESPN арнасы да хабар таратып келген.
Асқар Салықбаев
MTK GLOBAL KAZAKHSTAN менеджерлік компаниясының президенті
- Осыған дейін ESPN арнасында бес мәрте бокс кешін ұйымдастырдық. Биылғы жылдың 10-ші шілдесінде болатын бокс шоуынан кейін ол арнамен келісім-шартымыз аяқталуы тиіс еді. Осы орайда басқа арналардың шарттарын қарастырып жатқанбыз. Нәтижесінде ESPN арнасы бізбен ары қарай жұмыс істеуге дайын екенін сонымен қатар, төлейтін қаржысы бұрынғыдан екі есе көп болатынын жеткізген соң сол арнамен келісім-шартымызды 2023-ші жылға дейін ұзартып отырмыз. Біздің міндетіміз – келісім аясында 10 бокс кешін ұйымдастыру болып отыр.
Сонымен қатар TUKESHOV BOXING PROMOTION промоутерлік компаниясы Қазақстан чемпионы белбеуін ұйымдастыратын болады. Аталмыш жекпе-жек кеші маусым айының соңғы аптасына жоспарланған. Ұйымдастырушылардың айтуынша бокс кеші жаңа форматта өтеді. Яғни әр салмақта төрт және одан да көп былғары қолғап шебері белбеуге таласқа түседі.