Республикалық жеке сот орындаушылар палатасы Алматыда сот орындаушысын ұрған адам боксшы Жанқош Тұраровты шақырғанын мәлімдеді, деп хабарлайды Tengrinews.kz тілшісі.
Жеке сот орындаушылар палатасының мәліметінше, сот орындаушысы А.А.Ермековке Алматының Бостандық ауданындағы нысанды бұзу кезінде шабуыл жасалған. Ер адам сот орындаушысын буындырып, ғимаратты бұзуды тоқтатуды талап еткен, кейін қабырғасы мен өкпе тұсынан соққы жасаған.
"Соққы полиция қызметкерлерінің көзінше болған. Жедел жәрдем дәрігері соққының денсаулыққа орташа дәрежеде зиян келтіргенін айтты. Оқиға кезінде полиция қызметкерлері қашып кетіп, оқиға орнында болмаған. Сот орындаушысы ұрып-соғу дерегі бойынша қылмыстық іс қозғау туралы арыз жазып, таяқ жегеннен кейін көшеге жүгіріп шыққан учаскелік полицияға берді. Полиция қызметкерлері бұл жағдайда үнсіз қалған, қылмыскерді ұстамаған. Сот орындаушысының М.Н.Ысқақовты ұстау туралы өтінішіне полиция қызметкерлері әрекет етпеген.
Ол сот орындаушысына және басқа адамдарға қысым жасау мақсатында боксшы Тұраров Жанқош Жасұланұлын оқиға орнына шақырған. Оқиға орнына келгеннен кейін боксшы сот орындаушысынан М.Н.Ысқақовқа қатысты полициядағы арызын алуды талап еткен", - делінген жеке сот орындаушылар палатасы сайтында.
Сондай-ақ, Жанқош Тұраров бұл әрекетті заңсыздық деп санап, осы жайт үшін қорқытқан.
"Содан кейін Ысқақов М.Н. мен Тұраров Ж.Ж. А.А.Ермековке қарсы физикалық соққы көрсетіп, қорқыта бастаған. Тікелей қысым көрсетіліп, сот актісінің талаптарын орындаудан бас тартқызуға мәжбүрлеген", - делінген жауапта.
Сот орындаушысы қызметін орындай алмаған. Оған жасалған шабуыл видеоға түсірілген.