"Қазақтың туын шет ел ареналарында көтергім келеді". Рай Сейітжанов жекпе-жекке дайындық пен саумалдың пайдасы туралы
10 шілдеде Алматыдағы Балуан Шолақ спорт сарайында MTK Glоbal Kazakhstan менеджерлік компаниясының ұйымдастыруымен өтетін бокс кешінде бірнеше отандық былғары қолғап шебері өнер көрсетеді. Олардың арасында Рай Сейітжанов (6-0, 3 КО) та бар. Сейітжановтың қарсыласы ресейлік Максим Чурбанов (8-8, 1) атанбақ. Vesti.kz тілшісіне арнайы сұхбат берген жерлесіміз дайындығы туралы әңгімеледі.
- Көптен күткен жекпе-жек кешіне санаулы күндер қалып отыр. Дайындығыңыз қалай өтіп жатыр? Білуімше, сіздер жаттығу барысында рационға саумалды қосады екенсіздер.
- Жекпе-жекке дайындығымыз жақсы өтіп жатыр. Жақында спаррингтерімізді аяқтадық. Енді жылдамдыққа жұмыс істеп жатырмыз. Иә, командамызбен саумалды жаттығу кезінде ішеміз. Ұлттық сусынымыздың емдік қасиеті мол. Сондықтан саумалды күнде ішетініміз рас.
- Қарсыласыңыз Максим Чурбановты қаншалықты зерттеп үлгердіңіз? Әлсіз тұстары бар ма екен?
- Қарсыласымды бапкерлік штабпен толық зерттеп шықтық. Әр спортшының осал тұстары болады. Кездесуге толыққанды дайынмын.
- 2020 жылы желтоқсанда Талғат Шәйкен Чурбановпен кездесіп, техникалық нокаутпен жеңген. Осы орайда Талғатпен кеңестіңіз бе?
- Иә, ақылдасқаным рас. Ресейліктің рингте өзін қалай ұстайтынын сұрадым. Алайда Талғат бауырым солақай мен оңқай тұрысты қолданатын боксшы болғандықтан, Чурбановтың оңқайлармен рингке шыққан видеоларын қарап шықтым.
- Кәсіпқой ринг төрінде отандық боксшылармен де қолғап түйістірдіңіз. Жерлестермен жұдырықтасу қаншалықты қиын?
- Кәсіпқой рингте үш мәрте өзіміздің жігіттермен шыққанмын. Бауырларымыз болған соң қиындау әрине. Дегенмен, кәсіпқой рингте өнер көрсеткендіктен, әркім өз жұмысын істеуі керек деп ойлаймын.
- Болашақта алға қойған мақсатыңыз қандай?
- Кез келген спортшының арманы – әлем чемпионы болу ғой. Менің де алға қойған мақсаттарым бар. Қазақтың туын шет ел ареналарында әрдайым көтеріп, атымды тарихта қалдырғым келеді.
Загрузка матч-центра...
Жарнама