Қазақстандық боксшы Данияр Ақбисенов Черногорияның Будва қаласында World Boxing ұйымы өткізіп жатқан 19 жасқа дейінгі спортшылар арасындағы әлем чемпионатының келесі кезеңіне жолдама алды, деп хабарлайды Vesti.kz.
60 келіге дейінгі салмақ дәрежесінде өнер көрсететін отандасымыз жарысты грузиялық Сандро Капанадземен жекпе-жектен бастады. Кездесу кешкі сессия аясындағы 1/16 финалда өтіп, тартысты өрбіді.
Қарсыластар үш раунд бойы басымдыққа таласты. Нәтижесінде төрешілердің бөлек шешімімен Ақбисенов 3:2 есебімен жеңіске жетті.
Осылайша, Капанадзе жарыстан шығып қалса, қазақстандық боксшы әлем чемпионатының жүлдесі үшін күресті жалғастырады.
World Boxing ұйымы өткізіп жатқан жасөспірімдер арасындағы әлем чемпионаты 27 қазанға дейін жалғасады. Жарыста 69 елден келген 474 спортшы ерлер мен әйелдер арасындағы он салмақ дәрежесінің әрқайсысында жүлде үшін бақ сынап жатыр.
Жарнама