"Канело" Альварестің бапкері жарақат пен карьераны аяқтау туралы сөз қозғады

WBA (Super) және WBC (Franchise) чемпионы Сауль "Канело" Альварестің (53-2-1, 36 КО) бапкері Эдди Рейносо TUDN арнасына берген сұхбатында мексикалық боксшының денсаулығы жайлы айтып берді.

18 шілдеде Альварес 30 жасқа келді. Кәсіпқой рингте он бесінде жұдырықтаса бастаған боксшы осы жасқа келгенде төрт салмақта чемпионы болып үлгерді.

Рейносоның сөзінше, Альварес қазір бірнеше жыл қинап келген тізе жарақатынан сауықты. 2019 жылы шілдеде ол көпшілік алдына балдақпен шыққан.

"Ол карьерасының шыңында. Саульде жарақат жоқ, тізесімен қиындық артта қалды. Қазір ол жақсы қарқынмен келеді және 30 жас үшін жақсы тәжірибе жинады. Оның алда әлі бес-жеті жылдай уақыты бар деген ойдамын, осы деңгейін сақтап тұратындай. Біз ұстанатын тәртіппен ешқандай қиындық болмайды", - дейді бапкер.