"Жылдың атышулы оқиғасы болады". Сарапшы Деревянченкода Головкинді жеңу мүмкіндігі үлкен екенін айтады

FightSpace жобасының негізін қалаушы Григорий Стангрит қазақстандық Геннадий Головкин (39-1-1, 35 КО) мен украиналық Сергей Деревянченко (13-1, 10 КО) жекпе-жегіне қатысты өз ойын білдірді. Vesti.kz тілшісіне берген сұхбатында ол украиналық боксшы 2019 жылдың атышулы жеңісіне жете алатынын айтады. 

"Үлкен бәсекелестік күтем. Головкин мықты боксшы, сондықтан Деревянченкоға оңай болмайды. Головкин чемпиондық деңгейде көптен жұдырықтасып келеді, кәсіпқойда оның тәжірибесі мол. Дегенмен Деревянченкода да Головкинде сияқты әуесқойдағы негізі мықты және жеңіске деген ынтасы зор. Ол Головкин сияқты биікте болған емес, сондықтан, Сергейдің қызығушылғы үлкен.  

Егер ол жеңсе, бұл 2019 жылдың атышулы жеңісі болады және оның өмірі түбегейлі өзгереді. Сергей кәсіпқойға келгенде де оған ақша жетпей, жүк тасушы болып істейтін. Бірақ ол мақсатынан тайған емес. Бұл жігіттің мінезі мен жеңіске деген ұмтылысы барын көрсетеді. Сондықтан бұл екі боксшы үшін де оңай жекпе-жек емес. Екеуі де мінезді, екеуінің де жоғалтатыны мен ұтары бар. Әңгіме титулда ғана емес. Осыдан кейін қандай жекпе-жектер болатындығында. Жеңімпаз Альвареспен жұдырықтасып, үлкен табысқа кенеле алады", - дейді Стангрит.

Еске салайық, Головкин - Деревянченко жекпе-жегі 5 қазанда Нью-Йорктегі Madison Square Garden аренасында өтеді. Боксшылар орта салмақта IBF титулы үшін жұдырықтасады.