Қазақстандық кәсіпқой боксшы Жәнібек Әлімханұлы WBO тарапынан берілген уақытша шеттету шешіміне қарсылық білдірді, деп хабарлайды Vesti.kz.
Орта салмақта WBO чемпионы атанып жүрген Әлімханұлы тыйым салынған мельдоний заты анықталғаннан кейін 2026 жылдың желтоқсанына дейін жарыстардан шеттетілген еді.
WBO президенті Густаво Оливьеринің айтуынша, қазақстандық боксшы мен оның командасы бұл шешіммен келіспей, ресми түрде шағым түсірген. Қазір апелляция ұйымның ішкі әкімшілік тәртібі аясында қаралуда. Арнайы комиссия құрамында заңгерлер мен лицензияланған мамандар бар, олар істі қарап, соңғы шешімді шығарады. Бұл туралы Boxing Social жазды.
Оливьеридің сөзінше, шағымдар мен даулар жөніндегі комитет істі белсенді түрде қарастырып жатыр. Қорытынды шешім дисквалификацияны өзгеріссіз қалдыруы, жеңілдетуі немесе толықтай алып тастауы мүмкін.
Қалыптасқан жағдайға байланысты WBO дивизиондағы белсенділікті сақтау үшін уақытша чемпиондық белбеу енгізді. Бұл мүмкіндікті британдық Дензел Бентли пайдаланып, венесуэлалық Эндри Сааведраны мерзімінен бұрын жеңіп, WBO Interim чемпионы атанды.
Алдағы уақытта WBO Бентли мен рейтингте екінші орында тұрған кубалық Йоэнлис Эрнандес арасында жекпе-жек тағайындауы мүмкін. Дегенмен, міндетті қорғаныс алдында Бентли өз промоутерінің өтініші бойынша ерікті түрде жекпе-жек өткізуі ықтимал.
Егер Жәнібек Әлімханұлының апелляциясы қанағаттандырылып, дисквалификация қысқартылса немесе толықтай жойылса, WBO оның Бентлимен жекпе-жегін жедел ұйымдастыруы мүмкін. Мұндай жағдайда Эрнандес чемпиондық титулға келесі міндетті үміткер мәртебесін сақтап қалады.
Посмотреть эту публикацию в Instagram
Еске салайық, 2025 жылдың желтоқсанында Жәнібек Әлімханұлы тапсырған допинг-сынамадан тыйым салынған мельдоний анықталған. Соның салдарынан оның WBA чемпионы, кубалық Эрисланди Ларамен жоспарланған жекпе-жегі өтпей қалған. Кейін екінші (B) сынама да дәл осы нәтижені растады, содан кейін ресми тергеу басталды.
2026 жылдың наурызында International Boxing Federation Әлімханұлын орта салмақтағы әлем чемпионы атағынан айырып, 2026 жылдың желтоқсанына дейін дисквалификациялады. Сонымен қатар, ұйым оны өз рейтингінен де алып тастады.
Ал World Boxing Organization өз тарапынан боксшыны бір жылға шеттеткенімен, оның орта салмақтағы чемпиондық титулын сақтап қалды.
Жарнама