"Головкин мексикалық стильге бармайды". Ердос Жаңабергенов атышулы жекпе-жекке қатысты мәлімдеме жасады
Бокстан 2005 жылғы әлем чемпионы, Геннадий Головкиннің ұлттық құрамадағы командаласы Ердос Жаңабергенов алдағы жекпе-жекке қатысты көпшілік күтпеген пікір айтты. Ердостың айтуынша, Головкин бұл кездесуде мексикалық стильмен жұдырықтаспай, қазақша бокс мектебіне көбірек басымдық береді, деп хабарлайды Bassport.kz.
"Бұл кездесуді бәріміз де асыға күтіп жүрміз. Бірден айтайын, Генаның жеңісіне 200 пайыз сенімдімін. Өйткені, бұл жекпе-жекке Головкин тыңғылықты дайындалды. Одан бөлек, өзінің дайындап отырған әдіс-тәсілдері бар. Жекпе-жек алдында мексикалық стиль деп жиі айтып жатыр ғой.
Меніңше, Головкин мексикалық стильге бармайды. Ол өзіміздің қазақ боксының стилімен жұдырықтасады. Яғни, аяқпен жиі ойнап, ара қашықтықты ұстап, соққыларын "Канелоға" дәл тигізеді деп ойлаймын. Ол менің командаласым, ұлттық құрамада көп нәрсені үйреткен бауырым десем де болады. Сондықтан жерлесіміздің жеңісіне кәміл сенемін", – деді бұрынғы боксшы.
Сондай-ақ, Ердос Жаңабергенов Головкиннің екінші жекпе-жекте не үшін ұтылғанын айтты.
"Қазақта мүшел жас деген бар. Бұл кезеңде сынақтар, сәтсіздіктер көп болады. Головкин мен Альварестің екінші жекпе-жегі сол кезеңге тап келді. Ал қазір оның бәрі артта қалды. Гена бабында, күші бойында. Оның үстіне Альварес қазір бұрынғыдай емес. Оның да қарқыны бәсеңдеді.
Жалпы "Канело" Генадан басқа мықты боксшылармен кездескен жоқ. Жақында Биволдан жеңілді. Биволдың өзі ортадан сәл ғана жоғары боксшы санатында. Альварес мерзімінен бұрын жеңеді деген пікірлер де жаңсақ. Бұйырса алдағы жекпе-жекте Головкин өзінің мықтылығын тағы бір дәлелдейді", – деді Ердос.
Загрузка матч-центра...
Жарнама