Өзбекстандық блогер Абдурахмон Фозилов Дубайда (БАӘ) өткен бокстан 2025 жылғы әлем чемпионатының финалында болған даулы жағдайға байланысты Халықаралық бокс қауымдастығының (IBA) шешіміне пікір білдірді, деп хабарлайды Vesti.kz.
Әңгіме 60 келіге дейінгі салмақ дәрежесіндегі финалдық жекпе-жек туралы болып отыр. Аталған айқаста ресейлік боксшы Всеволод Шумков өзбекстандық Абдумалик Халоковтың құлағын тістеп алған. Жекпе-жектің өзі төрешілердің бөлек шешімімен Шумковтың жеңісімен аяқталған еді.
Бұл жағдайды қарастырғаннан кейін IBA жекпе-жек нәтижесін өзгеріссіз қалдыру туралы шешім қабылдады. Осылайша, алтын жүлде ресейлік боксшыда қалды.
"Құрметті Умар Назарович (IBA басшысы), мен сізді қатты құрметтейтінмін. Сізді мейірімді, адал, жомарт әрі ең әділ спорт қайраткері деп санайтынмын. Спорт үшін, әсіресе бокс үшін өте көп еңбек сіңірдіңіз деп ойладым, бірақ, өкінішке қарай, қатты қателескен екенмін. Сіздің қарамағыңыздағы IBA ұйымының Олимпиада ойындарынан шеттетілгені бекер емес екен. Өйткені олар Шумковтың пайдасына шешім шығарды, ол өзі бас хатшымен бірге баспасөз мәслихатында қарсыласын сәл тістеп алғанын мойындады. Мұнда енді айырмашылық жоқ: тістеді ме, қысты ма - бәрібір. Себебі "аздап қана көтеріп қалды" деген болмайды.
Әлемдік баспасөздегі тосын жаңалықтарды күтіңіз, Кремлёв мырза. Мен сізді қаншалықты әділ деп есептесем, сіз соншалықты төмендедіңіз — тек менің көзімде ғана емес, бүкіл Азияның, бүкіл әлемнің алдында. Сіз үшін бұл — ақша, Ресейдің мүддесі. Егер бұл басқа спортшы болса, басқа елдің өкілі — мейлі Қазақстан немесе Өзбекстан болсын — сол сәтте-ақ медальді тартып алар едіңіздер. Өйткені өткен жылы әділдік танытып, Хавасбектің медалін алып, оны қазақстандық спортшыға берген едіңіздер. Ол тіпті мінберге шығып үлгермеген еді. Ал қазір сіздің спортшыңыз белбеумен жүріп: "Мен жеңдім, мен жеңдім" дейді. Сәл ғана тістеп, күлімсіреу — бұл жеңіс емес. Бұл — сіздер үшін масқара. IBA үшін де масқара. Мұны біліп жүріңіздер", — деді Абдурахмон Фозилов әлеуметтік желіде.
Айта кетейік, бұған ұқсас жағдай бұған дейін де өзбекстандық боксшының қатысуымен болған. 2024 жылдың желтоқсанында Таиландта өткен Азия чемпионатында Хавасбек Асадуллаев финалдық жекпе-жекте қарсыласын иығынан тістеп алғаны үшін өрескел ереже бұзушылық ретінде дисквалификацияланған. Нәтижесінде жеңіс қазақстандық боксшы Абылайхан Жүсіповке берілген болатын.