Орта салмақта WBC титулына ие доминиканалық боксшы Карлос Адамес (24-1-1, 18 КО) қазақстандық Жәнібек Әлімханұлымен (17-0, 12 КО) белбеу біріктіретін жекпе-жек өткізуге дайын екенін мәлімдеді, деп хабарлайды Vesti.kz.
Оның айтуынша, келіссөздер аяқталуға жақын."Біз бұл жекпе-жекке ұзақ уақыт бойы ұмтылып келдік, келісімге келе алмадық, бірақ ол міндетті түрде өтеді. Бұл келесі жекпе-жегіміз болатыны анық – бұл мәселе шешілуге таяу", – деп береді Адаместің сөзін Boxing Studs Noticias X-парақшасы.
Бұған дейін Жәнібек пен Адамес 22 қарашада Сауд Арабиясының Эр-Рияд қаласында жұдырықтасуға келісіп жатқаны туралы хабарланған еді.
Адамес соңғы жекпе-жегін 22 ақпанда Сауд Арабиясында өткізіп, британиялық Хамза Ширазбен (22-0-1, 18 КО) тең түсті. Бұл нәтиже Карлосқа өз титулын сақтап қалуға мүмкіндік берді.
Жәнібек Әлімханұлы соңғы рет 5 сәуірде Астанада жұдырықтасып, бесінші раундта франциялық Анауэль Нгамиссенгені (14-1, 9 КО) нокаутқа түсіріп, WBO және IBF белбеулерін сәтті қорғап қалды.