Ауыр салмақтағы өзбекстандық боксшы Баходир Джалолов (13-0, 13 КО) 2024 жылғы Париж Олимпиадасының алтынын жеңіп алмақ ниетте. Одан кейін ол кәсіпқойда мықты деген боксшылардың бірімен айқаспақ, деп хабарлайды Vesti.kz.
"Менің алдағы мақсатым - Олимпиаданың екінші алтынын иелену, одан кейін кәсіпқойға ораламын. Александр Усик, Тайсон Фьюри, Энтони Джошуа - маған бәрібір, мен дайынмын", - деп береді Джалоловтың сөзін vRINGe.com.
Айта кетейік, Баходир 17 қараша Ташкентте өтетін кәсіпқойдағы келесі жекпе-жегінде аты шықпаған оңтүстікафрикалық Крис Томпсонмен (12-5-1, 7 КО) жұдырықтасады.
Еске салайық, Джалолов 2020 жылы Токиода өткен Олимпиада ойындарының алтынын жеңіп алған. Сонымен қоса, әлем чемпионы (2019, 2023), Азия ойындарының (2022) және Азия чемпионатының жеңімпазы (2017, 2019, 2021).