Орта салмақта IBF және WBO чемпионы Жәнібек Әлімханұлының (17-0, 12 KO) командасы B допинг-сынамасының ашылуына қатысты пікір білдірді, деп хабарлайды Vesti.kz.
"Алла қаласа, B сынамасы бүгін ашылады. Америкада енді таң атып жатыр. Команда мүшелері ресми қатысады. Сынама зертханаға жөнелтіледі. Нәтиже белгілі болғанда ресми түрде жарияланады! Алла қаласа, бәрі жақсы болады!" — делінген команданың әлеуметтік желідегі хабарламасында.
Еске салсақ, желтоқсан айының басында қазақстандық боксшының алғашқы допинг-сынамасы тыйым салынған заттың бар екенін көрсетті. Осы себептен WBA чемпионы кубалық Эрисланди Ларамен (32-3-3, 19 KO) титул біріктіретін жекпе-жек кейінге қалдырылған еді. A сынамасы нәтижелері жарияланған соң, Әлімханұлының командасы B сынамасын ашу рәсімін бастады. Бұл процедура 9 қаңтарға жоспарланған болатын, енді антидопингтік ұйымдардың ресми қорытындысын күту қалды.
Қайта жүргізілген талдаудың нәтижесі Жәнібек Әлімханұлының алдағы мансабы үшін шешуші мәнге ие болады. Сонымен қатар, бұл оның болашақ чемпиондық жекпе-жектеріне, титулдарына және спорттық келешегіне тікелей әсер етеді.
Жарнама