Орта салмақта WBO және IBF чемпионы Жәнібек Әлімханұлының менеджері Эгис Климас спортшының ағзасынан тыйым салынған препараттың анықталуына қатысты кеңінен түсініктеме берді, деп хабарлайды Vesti.kz.
Былтыр желтоқсан айында алынған допинг-сынама оң нәтиже көрсеткен. Тергеу қорытындысы бойынша биыл ақпанда WBO шешім шығарып, Әлімханұлы 2026 жылдың 2 желтоқсанына дейін дисквалификацияланды. Дегенмен, ол чемпиондық титулын сақтап қалды.
Медициналық себептер
Америкалық журналист Стив Кимнің мәліметінше, өткен жылдың 7 мамырында Әлімханұлы қатты бас ауруы, жүрек айну, бас айналу және құсу белгілерімен клиникаға жүгінген. Бұған дейін, 25 сәуірде ол Астанада франциялық Анауэль Нгамиссенгеге қарсы жекпе-жек өткізген болатын.
Емдеу барысында спортшыға рипронат препараты тағайындалған. Оның белсенді заты - мельдоний. Медициналық есепте препараттың көктамыр арқылы "өткір деңгейдегі ұстамаға байланысты" енгізілгені көрсетілген.
Менеджердің ұстанымы
Климас ем қабылдау сәтінде ешқандай ереже бұзылмағанын атап өтті:
"Біз мельдоний ағзада тоғыз айға дейін сақталуы мүмкін екенін анықтадық. Ол клиникада ем алған кезде алда жоспарланған жекпе-жек болған жоқ және WADA тестілеу бағдарламасында болмаған. Дәрігерлер оны толықтай заңды препараттармен емдеді. Бұл елде (Қазақстанда) аталған дәрі тіпті рецептсіз сатылады", - деп береді Эгистің сөзін Стив Ким.
Жарнама