Орта салмақтағы WBO тұжырымы бойынша әлем чемпионы Жәнібек Әлімханұлы (17-0, 12 KO) карьерасына қатысты болашақ жоспарын айтты, деп хабарлайды Vesti.kz.
Жаңа мақсаты туралы мәлімдеді
Қазақстандық боксшы қол жеткізген жетістіктерімен шектеліп қалмайтынын және алдағы уақытта чемпиондық белбеулер санын көбейтуді көздейтінін аңғартты.
"Біз үш салмақ дәрежесінде әлем чемпионы атану жолындамыз!"
Осындай жазбаны Әлімханұлы әлеуметтік желідегі парақшасында жариялады.
Боксшы әлі де дисквалификациясын өтеп жатыр
Еске салайық, бұған дейін Жәнібек Әлімханұлы орта салмақта IBF және WBO нұсқалары бойынша әлем чемпионы болған еді. 2025 жылдың соңында ол WBA чемпионы кубалық Эрисланди Ларамен титул біріктіретін жекпе-жегін өткізуі тиіс болатын.
Алайда қазақстандық боксшының допинг-сынамасы оң нәтиже көрсеткеннен кейін кездесу өтпей қалды.
Кейіннен IBF Әлімханұлын чемпиондық белбеуінен айырып, оны 2026 жылдың желтоқсанына дейін жарыстардан шеттетті. Ал WBO өз тарапынан боксшыға бір жылдық дисквалификация беріп, бірақ чемпиондық титулын өзінде қалдырды.
Жарнама