Қазақстандық боксшы Жәнібек Әлімханұлы (17-0, 12 КО) екінші орта салмақта WBO чемпионы Хамза Ширазбен (24-0-1, 19 КО) титулдық жекпе-жек бойынша келіссөздің созылып кеткеніне наразылық білдіріп, британиялықты нақты шешім қабылдауға шақырды, деп хабарлайды Vesti.kz.
"Ол мұны тым созып жіберді. Егер бұл жекпе-жекті қаласа, оны ашық айтып, өткізу керек. Егер жекпе-жек өткізгісі келмесе, титулдан бас тартсын. Босқа селтеңге менің уақытым жоқ!", - деп жазды Әлімханұлы әлеуметтік желідегі парақшасында.
Дедлайн қашан аяқталады? Әлімханұлы - Шираз айқасымен не болады?
4 қыркүйекте Top Rank және Queensberry Promotions промоутерлік компаниялары Әлімханұлы мен Хамза Шираз арасындағы титулдық жекпе-жек бойынша келіссөз мерзімін тағы бір апта ұзартуды сұрап, WBO-ға бірлесіп өтініш білдірді.
Ұйым тараптардың өтінішін қанағаттандырып, келіссөздерге жаңа мерзім белгіледі. Енді боксшылардың командалары 2026 жылғы 10 қыркүйек, атлантикалық уақыт стандарты бойынша 17:00-ге дейін (Қазақстан уақытымен 11 қыркүйек сағат 02:00-ге дейін) келісімге келіп, қол қойылған келісімшартты WBO-ға ұсыну қажет.
Егер белгіленген мерзімде келісімге келмесе, әрі қарайғы шешімді WBO-ның чемпиондық титулдар жөніндегі комитеті қабылдайды. Мұндай жағдайда ұйым Әлімханұлы - Шираз жекпе-жегіне промоутерлік сауда белгіленеді.
Қазақстандық жоғары салмаққа көтерілді
Бұған дейін Әлімханұлы орта салмақта WBO және IBF чемпионы болған. 2025 жылдың соңында қазақстандық боксшы WBA титулының иегері Эрисланди Ларамен титул біріктіретін айқас өткізуі керек еді. Алайда Әлімханұлының допинг-тестінен тыйым салынған зат анықталғаннан кейін кездесу өтпей қалды.
Нәтижесінде IBF қазақстандық боксшыны чемпиондық белбеуінен айырса, WBO оны бір жылға жарыстардан шеттетті. Дегенмен ұйым Әлімханұлының чемпиондық титулын сақтап қалды.
Шілдеде Әлімханұлы екінші орта салмаққа ауысатынын жариялап, орта дивизиондағы WBO белбеуінен бас тартты. Ал тамызда ұйым қазақстандық боксшыны жаңа салмақта чемпионға міндетті қарсылас ретінде бекітті. Бұл белбеу қазіргі таңда британиялық Хамза Ширазда.
Қыркүйектің басында Әлімханұлы WBO-ның супер орта салмақ рейтингінде бірінші орынға көтерілді. Бұған дейін қазақстандық боксшы екінші орында тұрған. Ал көшбасшында Сауль "Канело" Альварес болатын. Алайда мексикалық WBC титулы үшін алдағы жекпе-жегіне байланысты рейтингтен шығарылды.
Жарнама