Қазақстандық боксшы Батыр Жүкембаев (18-0, 14 КО) Vesti.kz тілшісіне берген сұхбатында АҚШ-тағы өмірі, жаңа менеджері мен Энди Руистің бұрынғы бапкерімен қалай жаттығып жатқанын айтып берді.
- Батыр, армысың! Жағдайың қалай? АҚШ-та жанкүйерлерің көбейе түсті ме?
- Армысыздар! Қазіргі кезде жанкүйерлерімнің қолдауын бұрынғыдан бетер сезініп жатырмын. Әлеуметтік желіде қазақстандықтар жазып, сәттілік тілеуде. Бәріне алғысымды білдіремін. Бокс сүйетін америкалықтар да тілеуін айтып жатыр. Бұл елде менің келгенімнен хабардар, талқылап та жатыр.
- Сен осыған дейін АҚШ-та бірнеше рет болғансың, енді Лос-Анджелесте тұрақты тұрып жатырсың. Үйрендің бе? Канаданы сағынасың ба?
- Иә, бәрі жақсы. Бұл қала бірден ұнады. Бұл қалада бокс қайнап тұр, сондықтан маған үлкен тәжірибе. Канада екінші үйімдей болған, карьерамның көп бөлігі сонда өтті. Енді жаңа деңгейге көтеріліп, АҚШ-та чемпиондыққа ұмтыламыз.
- Карьераңда маңызды стратегиялық өзгерістер жасай алдың. Командаңды жаңарттың, жаңа бапкермен жаттығу қалай өтіп жатыр?
- Ұсыныстар арасында ұнағаны Мэнни Роблестікі болды. Ол Энди Руис пен Оскар Вальдес сияқты боксшыларды жаттықтырған. Бірінші жаттығуда-ақ тіл табысып кеттік. Ол біз кездескенге дейін жекпе-жектерімді қарап, сараптама жасап үлгеріпті. Өзінің жоспары мен стартегиясын айтты. Ол өз ісінің маманы, онымен жұмыс істеп жатқанымызға қуаныштымын.
- Сен MTK Global компаниясының атақты менеджерімен де келісімшартқа отырдың.
- Бұл ынтымақтастыққа қуаныштымын. Қазірі таңда карьерама үлкен қадамдар қажет. Рик Мириджан халықаралық деңгейдегі маман. Онымен ынтымақтастық менің карьерамды жаңа деңгейге көтереді. Қазір менеджер мен менің мақсатым бір - АҚШ пен әлем нарығын бағындыру, әлем чемпионы атану.
- IBF бірінші орта салмақта чемпионға міндетті қарсыласты анықтамақ деген ақпарат бар. Төрт боксшының арасында сен де барсың, бұл сенің мүмкіндігің бе?
- Әрине, бұл жақсы мүмкіндік. БАҚ төрт үміткер ретінде мені, пуэрторикалық Сабриэль Матиас (16-1, 16 КО), британиялық Льюис Ритсон (21-1, 12 КО) және аргентиналық Йеремиас Понсені (27-0, 17 КО) атады. Бәріміз де ұйымның топ-15 рейтінгіндеміз. Менеджерім келіссөздер жүріп жатқанын айтты. Қарсыластың есімі келісімшартқа қол қойған соң белгілі болады.