Қазақстан ерлер құрамасының өкілдері Төрехан және Махмұт Сабырхан Испанияда өткен Boxam Elite-2026 халықаралық турнирінің ең үздік 10 боксшысының қатарына енді. Бұл рейтингті британиялық белгілі бокс сарапшысы Мэтт Робинсон жасады, деп хабарлайды Vesti.kz.
Сабырханның кішісі - турнирдің үздігі
Сарапшы Төрехан Сабырханды турнирдің ең үздік боксшысы деп таныды. Ал оның ағасы Махмұт Сабырхан Робинсонның жеке рейтингінде жетінші орынға тұрақтады.
"Бұл - Ла-Нусияда өткен Boxam Elite 2026 турнирінен кейінгі менің топ-10 боксшым. Алдыңғы тізімдерімдегідей, бұл алтын иегерлерінің рейтингі емес. Бұл - мені ең қатты таңғалдырған, ғажайып өнер көрсеткен немесе шын мәнінде әсерлі жеңістерге жеткен боксшылардың жеке топ-10 тізімі.
Бірінші орын үшін Төрехан мен Әл-Альмади арасындағы бәсеке өте тартысты болды, себебі екеуі де турнир бойы жоғары деңгейде өнер көрсетті. Соңында мен Төреханға басымдық бердім, оған оның финалдағы өнері әсер етті. Дегенмен Әл-Альмадидің Сачинге қарсы финалдағы жекпе-жегі шешуші күннің ең жарқын кездесулерінің бірі болды", - деп жазды Робинсон.
Ағасының өнері де жоғары бағаланды. Сарапшы Махмуд Сабырханның өнеріне де ерекше тоқталды.
"Кейбіреулер Троубридждің Сабырханнан жоғары қойылғанына күмән келтіруі мүмкін, әсіресе Сабырхан қағаз жүзінде жеңіске жеткенін ескерсек. Алайда бұл менің бастапқы ұстанымыма қайта әкеледі: мен Сабырхан алтын алады деп күткенмін (финалдың жарақат салдарынан тоқтатылғанын ескерсек те), ал Эллис турнирлік торды алғаш көрген сәтте-ақ финалға дейін жетеді деп мүлде ойламадым. Оның турнир барысындағы жолы мен үшін нағыз тосынсый болып, зор әсер қалдырды", - деп жазды Робинсон әлеуметтік желідегі парақшасында.