Ирландиялық боксшы Аарон Маккенна (20-0, 10 KO) орта салмақта WBO және IBF чемпионы қазақстандық Жәнібек Әлімханұлын (17-0, 12 KO) ашық түрде жекпе-жекке шақырды, деп хабарлайды Vesti.kz.
"Орпрта салмақта екеумізден бәрі айналып қашады. Оған қоса, тек екеуміз ғана кез келгенімен жұдырықтасуға дайынбыз. Ендеше, жекпе-жек ұйымдастырайық!" – деп жазды Маккенна өзінің әлеуметтік желідегі парақшасында.
Ирландиялық боксшы бұл жазбасында Жәнібек Әлімханұлын, саудиялық бокс меценаты Турки әл аш-Шейхті, сондай-ақ The Ring журналын белгілеген.
"Жаншығыш" лақап атты Маккенна кейінгі жекпе-жегін сәуір айында Лондонда өткізіп, әлемнің бұрынғы чемпионы британиялық Лиам Смитті (33-5-1, 20 KO) төрешілер шешімімен жеңген болатын.
Ал Жәнібек Әлімханұлы сәуірде Астанада өткен айқаста чемпиондық атақтарын сәтті қорғап, франциялық Аннауэль Нгамиссенгені (14-1, 9 KO) бесінші раундта нокаутқа түсірген.