Бирмингемдегі "Гаухар лигада" Рохас, Ибаргуэн, Рыпакова үштігі тағы сынға түседі

Англияның халқының саны жөнінен Лондоннан кейінгі ең үлкен қаласы Бирмингемде жеңіл атлетикадан «Гаухар лига» сайысының кезекті кезеңі өтеді.

Қатысушылардың арасында қазақстандық Ольга Рыпакова да бар. Жеңіл атлетикадағы коммерциялық турнир саналатын «Гаухар лиганың» бұл биылғы маусымдағы он екінші кезеңі. Ал үш қарғып секірушілер осымен төртінші мәрте сынға түспекші. Бирмингемдегі кезеңнің қорытындысы бойынша алдағы екі финалға қатысатындар анықталады. Бірінші финал 24 тамызда Цюрихте, екінші финал 1 қыркүйек Брюсселде өтеді. «Гаухар лиганың» бас жүлдесі – 50 мың доллар.

Ұлыбританиядағы кезеңге үш қарғып секіруден 9 атлет қатысуға ниет білдірген. Оның сегізі Лондонда өткен әлем чемпионатының финалисі. Олар: Юлимар Рохас (Венесуэла), Катрин Ибаргуэн (Колумбия), Ольга Рыпакова (Қазақстан), Анна Князева-Миненко (Израиль), Анна Ягачак (Польша), Шаника Риккетс (Ямайка), Патрисия Мамона (Португалия), Кимберли Уильямс (Ямайка), Жанин Ассани-Иссуф (Франция).

Бұл жолы бас жүлдеден Рохас, Ибаргуэн, Рыпакова үштігі үмітті. Осы маусымдағы ең жоғары нәтижені де аталған үштік көрсеткен.

Рыпакова негізі Ұлыбританияда көбіне сәтті өнер көрсетеді. Бұған дейін 2012 жылы Лондондағы Олимпиада ойындарында алтын, 2017 жылы әлем чемпионатында қола жүлде алған еді. Ал Бирмингемдегі «Гаухар лига» кезеңдерінде әр жылдары үздік үштіктен табылған. 2012 жылы – үшінші, 2014 жылы – екінші, 2016 жылы – бірінші орын алды.

Қазіргі кезде Цюрихтегі финалға Ибаргуэн, Уильямс, Рохас, Рыпакова, Мамона жолдама алып қойған. Қалған үшеуі осы жолы анықталады.

Әлеуметтік желілерде бөлісу