Чемпиондар лигасы: "Ливерпуль", "Барселона" мен "Челси" жеңді, Милик хет-трик жасады, ал "Зенит" ұтылды

Reuters©

11 желтоқсанға қараған түні Чемпиондар лигасы топтық кезеңінің соңғы, алтыншы туры аясында сегіз матч өтті, - деп хабарлайды Vesti.kz.

Е тобында италиялық "Наполи" бельгиялық "Генкті" 4:0 есебімен тас-талқан етті. Аркадиуш Милик хет-трик жасады. Ол 17 жастағы Мартен Вандевордттың қақпасына 3, 26 және 38-минутта гол соққан. Ал 74-минутта Дрис Мертенс матч нүктесін қойды.

Чемпиондар лигасының қазіргі жеңімпазы "Ливерпуль" сырт алаңда австриялық "Зальцбургті" 2:0 есебімен жеңді. Англиялық клуб екінші таймда қатарынан екі гол соқты: 57-минутта Наби Кейте, 58-минутта Мохамед Салах көзге түсті.

F тобында "Интер" өз алаңында "Барселонаның" аралас құрамына 1:2 есебімен жол берді. 23-минутта Карлос Перес қонақтарды алға шығарған, 44-минутта италиялық клуб Ромелу Лукакудың голымен жауап қатты. Кездесудің 87-минутында 17 жастағы Ансу Фати "Барселонаға" жеңіс сыйлады.

Бұл топтың екінші матчы Дортмундта өтті, "Боруссия" чехиялық "Славияны" қабылдап, 2:1 есебімен жеңді. Неміс клубы сапынан Джейдон Санчо (10-минутта) мен Юлиан Брандт (61), қонақтардан Томаш Соучек (43) қанжығасын майлады. 77-минутта алаң иелері сапынан Юлиан Вайгль алаңнан қуылғанымен, "Боруссия" жеңісті уысынан жібермеді.

F тобында франциялық "Лион" германиялық "РБ Лейпцигтен" 0:2 есебімен жеңіліп жатып, таразы басын теңестіре алды. Бірінші таймда қонақтар екі рет пенальтиден гол соқты: 9-минутта Эмиль Форсберг көзге түссе, 33-минутта Тимо Вернер нүктеден дәл соққы жасады. Бірақ екінші таймда Уссем Ауар (50-минутта) мен Мемфис Депайдың (82) голдары алаң иелеріне жеңіс сыйлап, плэй-оффқа жолдама берді.

Бұл топтан Еуропа лигасына "Бенфика" аттанды, португалиялық клуб өз алаңында "Зенитті" 3:0 есебімен тас-талқан етті. "Бенфикаға" жеңісті Франко Серви (47-минутта) мен Пиццидің (58, пенальтиден) голдары және Сердар Азмунның автоголы сыйлады. Матчтың 57-минутында Ресей чемпионы сапынан Дуглас Сантос алаңнан қуылған.

Голландиялық "Аякс" Н тобында өз алаңында испаниялық "Валенсиядан" жеңілді - 0:1. Жалғыз голды 24-минутта Родриго соқты, ал 93-минутта қонақтар он ойыншымен қалды - Габриэль Паулиста алаңнан қуылған.

Англиялық "Челси" өз алаңында франциялық "Лилльді" жеңді - 2:1. Лондондықтар сапынан 19-минутта Тэмми Абрахам мен 35-минутта Сезар Аспиликуэта көзге түсті. Ал 78-минутта Лоик Реми есеп айырмасын қысқартты.