"Головкиннің ізімен келеді". Спарринг қарсыласы Елеусіновтің чемпиондық кездесуге қалай дайындалып жатқанын айтты

Сурет: Delray Beach Boxing Club©

Қазақстандық боксшы Данияр Елеусінов (9-0, 5 КО) әлемнің бұрынғы чемпионы Джулиус Индонгоға 23-2, 12 КО) қарсы кездесуге керемет дайындалып жатыр. Бұл туралы Vesti.kz порталының тілшісіне отандасымыздың спарринг қарсыласы Патрик Кора (10-0, 7 КО) айтып берді. Сонымен қатар, ол жартылай орта салмақта IBF Intercontinental белбеуі үшін өтетін бұл кездесуде кімнің фаворит екенін айтты.

"Данияр Елеусінов дәл қазір керемет физикалық бабында. Оның жылдамдығы мен техникасы мықты. Бұл мен үшін де тәжірибе болатын боксшы. Біз бірнеше спарринг өткіздік. Индонгоны зор сынақ күтіп тұр деп нық сеніммен айта аламын.

Мен көптеген қазақстандық боксшыларды білемін. Олардың барлығы мықты әрі қауіпті. Ең басты жұлдыз - Геннадий Головкин. Бірақ оның ізін басып келе жатқан боксшылар аз емес. Солардың бірі - Елеусінов. Оның әлем чемпионы болатынына сенімдімін. Бұл тек уақыттың еншісіндегі дүние"- деді Кора.

Еске салайық, Елеусіновтің белбеу үшін өтетін бұл кездесуі 27 қарашаға жоспарланған Голливудта (Флорида штаты, АҚШ) өтетін бокс кешінде ол Джулиус Индонгомен кездеседі. Ал жекпе-жек кешінің басты айқасында Геннадий Головкиннің бұрынғы қарсыластары - Дэниель Джейкобс пен Габриэль Росадо кездеседі.

Айта кетейік, Индонго бұған дейін бірінші орта салмақта IBF, WBA және IBO белбеулерінің иегері болған.

Әлеуметтік желілерде бөлісу