"Басыңды қауіпке тіккің келмейді!". Жеңісін қазақ халқына арнаған спортшы дағыстандық "Жыртқышқа" бәс ұсынды

Сурет: instagram/qazmma_tm

Қазақстандық аралас жекпе-жек шебері Артем Резников дағыстандық "Тақырбас жыртқыш" лақап атты Магомед Исмаиловке бәске келуді ұсынды.

Мәскеуде өткен ACA 111 турнирінде 28 жастағы қазақстандық спортшы шоудың басты жекпе-жектерінің бірінде 24 жастағы "Борз" (Бөрі) лақап атты шешенстандық Юсуф Раисовты төрешілер шешімімен жеңді. Осыдан кейін Резников шаршы алаңда тұрып: "Магомед Исмаилов 77 келіге түс, мен 77-ге көтерілемін. Нағыз тақырбас жыртқыш кім екенін анықтаймыз!", деген еді.

Бұған Исмаилов қазақстандық файтерге бұл ойы қауіпті екенін ескертіп, сес көрсетті. Дегенмен Резников бұл мақсатынан қайтар емес.

"Магомед, бұл салмақты бекер айтқан жоқпын. Өзің де Эдуард Вартанянға 77 келіде жұдырықтасайық дегеніңе көп уақыт болған жоқ! Білемін, басыңды қауіпке тіккің келмейді! Алайда бұл жақсы бір сынақ қой! Сені ауыр салмақта, 84 келіде де көрдік. Бірақ 77 келіде сондай болып қала аласың ба? Бәрі әділ, мен бір дивизион жоғары көтерілемін, ал сен біреу төмен түсесің. Міне, содан кейін екі тақырбас күш сынасады! Бәске келейік! Кім жеңілсе шашын иығына дейін өсіреді! Дайынсың ба? Сен дайынсың ба?", - деп жазыпты Резников Instagram желісінде.