Орта салмақта өнер көрсететін америкалық боксшы Деметриус Андраде (31-0, 19 КО) осы салмақтағы WBO белбеуінен бас тартатын секілді. Мұндай жағдайда ұйым бұл белбеуге міндетті қарсыластар арасындағы айқасты ұйымдастыру керек. Ал белбеуге басты үміткер - отандасымыз Жәнібек Әлімханұлы (11-0, 7 КО). Оның қарсыласы бразилиялық Эскива Фалькао (29-0, 20 КО) болуы мүмкін, деп жазады Vesti.kz тілшісі.
Міндетті қарсыластың бірі Фалькао деп Lukie Boxing порталының авторы айтты. Ол Әлімханұлы мен Эскива арасындағы айқас көпшіліктің назарын аударатыны туралы айтты.
"Шынында біз Жәнібек Әлімханұлы мен Эскива Фалкао арасындағы бос қалған WBO белбеуіне айқасты көруіміз мүмкін. Біртүрлі, бірақ қызық айқас болады", - деп жазды автор.
Әлімханұлы үшін бразилиялық боксшы қиын қарсылас бола ма? Сірә, жоқ. Негізі Фалькао Геннадий Головкинге тиесілі IBF белбеуінің міндетті қарсыласы еді. Мұндай атаққа ол канадалық Патрис Вольниді жеңіп, қол жеткізді.
Дегенмен Лас-Вегастағы сол айқасты Эскива нашар өткізді. Оның үстіне алтыншы раудта боксшылар баспен қағысып, айқас тоқтатылды. Әйтпесе, Патрис енді ғана ашылып келе жатыр еді.
Вольни болса Әлімханұлынан деңгейі әлдеқайда төмен боксшы. Соққысы да қатты мықты емес. Сондықтан Фалькао мен Патрис Жәнібекке қауіпті емес.
WBO рейтингінгі екінші сатыда Хайме Мунгия тұр. 25 жастағы Мексиканың мықтысы 38 айқас өткізіп, барлығында жеңіске жеткен. Қазақстандық боксшыға қауіп төндірсе, осы Мунгия төндірер.
Бірақ та ол WBO белбеуіне аса қызығып жүрген жоқ. Оның басты мақсаты - екінші отандасымыз Головкинмен кездесу.
Одан кейін тізімде Дэнни Дигнам, Крис Юбэнк, Карлос Адамес, Лиам Уильямс секілді боксшылар бар. Міне Жәнібек осы боксшылардың бірімен кездесуі әбден мүмкін.
Дегенмен де уақыттың алдына түсіп жүгірмейік. Осы қаңтар айында Top Rank басшысы Боб Арум Андраденің командасымен келіссөз өткізеді. Егер Деметриус расында белбеуден бас тартса, Әлімханұлына басқа қарсыластар іздестіріледі.
Әзірге әліптің артын бағайық ...