Орта салмақта бұрынғы әлем чемпионы канадалық Давид Лемьенің (41-4, 34 КО) промоутері Камиль Эстефан Boxingscene.com порталына берген сұхбатында мексикалық Сауль "Канело" Альвареспен (53-1-2, 36 КО) келіссөздің неге тоқтап қалғаны туралы айтып берді, - деп хабарлайды
AllBoxing.Ru.
Боксшылар арасындағы жекпе-жек туралы бірнеше жыл айтылып келеді. Эстефанның сөзінше, Альварес Лемьеден қауіптенетіндіктен басқа қарсылас іздеп жүр.
"Алдын ала келіссөзден кейін "Канело" тарапынан ештеңе болмады. "Канело" - әлемдегі ең мықты боксшылардың бірі, сондықтан, кіммен жұдырықтасатынын өзі шешеді. Мәселе ақшада емес. Ол жағын талқылаған жоқпыз. Егер Давидпен жұдырықтасқысы келсе, келіссөзді жалғастырайық. Бірақ ол мұндай нокаутшымен жұдырықтасып қайтемін деп ойлайтын шығар.
Давид 31 жаста, бабында, күші де мығым. Дегенмен шыны керек, оның карьерасы ауыр болды. Салмақпен қиындықтар болып, соның салдары қымбатқа түсті. Егер Давидтің соққысы дәл тисе, кез келген сұлап түседі. Бұл "Канело" үшін өте қауіпті. Давид оны нокаутқа түсіре алады деген ойдамын. "Канело" мұндай қауіпке бара қоймас. Бұл бокс жанкүйерлері үшін тамаша кездесу болатын еді. Давидтің жекпе-жектері ешқашан іш пыстырмайды. Ол кез келген қарсыласты кез келген уақытта құлата алады", - дейді Эстефан.