Кәсіпқойда жеңіліп көрмеген қазақ боксшы Жанқош Тұраров (24-0, 17 КО) 18 желтоқсан Нұр-Сұлтанда өтетін бокс кешінде рингке шығады, деп хабарлайды Vesti.kz.
BoxRec мәліметінше, Жанқоштың қарсыласы 39 жастағы мысырлық Абдумонем Саид (22-1-1, 11 КО) болады. Жартылай орта салмақтағы жекпе-жек он раундқа есептелген.
31 жастағы Тұраров 2019 жылы WBO ұйымының құрлықтық титулын жеңіп алған, ал 2021 одан қорғаусыз айырылып қалды.
Еске салайық, бұл бокс кешінің басты айқасында Данияр Елеусінов (10-0, 6 КО) жартылай орта дивизионда IBO белбеуі үшін "Құтырған" мексикалық Данте Хардонмен (34-7, 25 КО) жұдырықтасады. Ал тағы бір басты кездесуде ауыр салмақтағы нокаутшы Иван Дычко (10-0, 10 КО) ресейлік Александр Устиновпен жекпе-жекке шығады.