Дубайда өткен әлем біріншілігінде Қазақстан құрамасының қоржынында алтын болуы керек еді. Мұндай пікірді Абылайхан Жүсіпов айтты. Сондай-ақ ол Vesti.kz порталына берген сұхбатында бұл жарыс Олимпиада ойындарына дайындық ретінде өткенін айтты.
Еске салайық, Азия чемпионатында Жүсіповтің өзі күміс жүлде алды. 69 килоның финалында ол өзбек боксшысы Бобо-Усман Батуровпен кездесіп, жеңіліп қалды. Бұл жекпе-жек бірінші раундта аяқталды. Себебі, Жүсіповтің қабағы жарылып кетті. Содан соң төрешілер жеңісті өзбекстандыққа берді.
"Биыл Азия чемпионаты Олимпиада ойындарының алдында өтті. Бұл турнирді біз Олимпиада алдында бабымызға келу үшін дайындық ретінде қарастырдық. Менің ойымша, жігіттердің барлығы жақсы өнер көрсетті. Біздің қоржында алтын болуы керек еді. Кейбір жігіттер жеңілді деп ойламаймын.
Негізі Азия чемпионаты биылдыққа басты жарыс емес. Ең маңызды бәсеке - Токиода өтеді. Олимпиада ойындарында мен де басқа жігіттер де жақсы өнер көрсетеміз деп сенемін.
Финалда баспен соғысып қалдық. Дайындығым жақсы болды. Мұндай жағдай бокста болып тұрады. Бастысы бұдан сабақ алып, келесі жолы қайталамау.
Енді аздап демаламыз. Үйге барып, отбасымызбен боламыз. Сосын Алматыда жиналып, жаттығуға кірісеміз", - деді боксшы.