Алматы облысындағы «Алатау» спорт кешенінде Қазақстанның төртінші қысқы спартакиадасы басталды.
Спартакиадаға еліміздің 9 аймағынан келген 125 үміткер бақ сынап жатыр. Жарысты бірінші болып, биатлоншылар басталды. Олар алдымен аралас эстафетада бақ сынап, шеберліктерін көрсетті. Жарыстың алғашқы күні Алина Райкова мен Тимур Хамитгатин жұбы топ жарса, Галина Вишневская мен Василий Подкорытов екінші орынды иеленді.
Ал Людмила Ахатова мен Владислав Киреев жұбы қола медальді қанағат тұтты. Бұл дода спортшыларымыз үшін Оңтүстік Кореяда өтетін XXIII қысқы Олимпиада ойындары алдындағы үлкен дайындықтың бірі екені даусыз. Бапкерлер сөзіне сенсек, биатлоншы қыз-жігіттер қысқы Олимпиадаға толықтай дайын көрінеді.
Осы жарыстан кейін, Қазақстан құрамасы Италия мен Германияда өтетін әлем кубогының кезеңдерінде бақ сынайды. Төртжылдықтың басты додасында ел намысын кімдер қорғайтыны осы кезеңдердің қорытындысы бойынша қаңтар айының соңында белгілі болады.
Жарнама