"Канело" Де Ла Хоядан кетуді ойластырғанға ұқсайды

Екі салмақта әлем чемпионы мексикалық Сауль "Канело" Альварес (52-1-2, 35 КО) 2010 жылдан бері ісін жүргізіп келе жатқан промоутері Оскар Де Ла Хойямен қош айтысуы мүмкін.

vRINGe.com ақпаратынша, Альварес өзге екі промоутермен құпия кездесу өткізген (есімдері аталмай отыр) және Golden Boy компаниясымен арадағы келісімді қайта қарастыру немесе толық сатып алу үшін заңгерді жалдаған.

Мексикалық боксшы Де Ла Хойямен жанжалдасып қалғаннан кейін осындай қадамға барған. Промоутер Альварес 350 миллион долларға келісім жасаған DAZN стриминг қызметіне Геннадий Головкинмен (39-1-1, 35 КО) үшінші жекпе-жекке уәде берген. Бірақ бұған "Канело" қарсы болған. 

Сонымен бірге, Альварес өзі тапқан табыстан промоутердің компанияның басқа боксшыларын жарнамалауға жұмсайтынына наразы. Оның үстіне боксшы IBF титулынан айырылуына қатысты да промоутерлік компанияға шағымын білдірген - Golden Boy міндетті қарсылас Деревянченкомен дедлайнға дейін келісе алмаған жағдайда Альварес белбеуден айырылады деген шартқа келіскен екен. 

Айта кетейік, "Канело" 14 қыркүйекте рингке оралмақ боды, алайда, Головкинмен жұдырықтасудан бас тартты. Ал ресейлік Сергей Ковалевпен жекпе-жек бойынша келіссөздер сәтсіз болғанда, қыркүйектегі жекпе-жегінен мүлде айнып, шаршы алаңға жыл соңында шығатын болды.