Орта салмақта IBF және IBO чемпионы Геннадий Головкин (40-1-1, 35 КО)
Sports Illustrated басылымына берген сұхбатында карьерасын қашан аяқтауды жоспарлап отырғанын айтты.
"Карьерамды қашан аяқтайтыным туралы үнемі ойлап келемін. 20 жаста болғанымда да ойлағанмын. Дегенмен менің өзіндік ойларым бар. Әлі бабымдамын, көңіл-күйім тамаша және болашаққа деген көзқарасым да керемет", - дейді сәуірде 38 жасқа келген Головкин.
Мұның алдында Головкин жоспарлары туралы айтқанда коронавирусқа байланысты карантин аяқталғаннан кейін IBF желісі бойынша міндетті қарсылас Камил Шереметамен (21-0, 5 КО) жекпе-жек өткізетінін мәлімдеген. Содан кейін мексикалық Сауль "Канело" Альвареспен (53-1-2, 36 КО) үшінші рет жұдырықтасуға дайын.
Айта кетейік, Шереметамен жекпе-жек Головкин үшін DAZN платформасымен жасалған келісімшарттағы алты жекпе-жектің үшіншісі болады. Кәсіби карьерасын қазақстандық 2006 жылы мамырда бастап, бірінші раундта венгриялық Габор Балогты нокаутқа түсірген.