"Спортингке" қарсы кездесуде барымызды салатын боламыз - Дмитрий Шомко

Сурет "Астана" клубының ресми сайтынан алынды

Швейцарияның Ньон қаласында Еуропа Лигасының 1/16 финалының жеребе тарту рәсімі өтіп, «Астана» командасына португалиялық «Спортинг» командасы қарсылас атанды.

Жеребе қорытындысы туралы елордалық команданың қорғаушысы Дмитрий Шомко өз пікірін білдірді:

- «Спортинг» - өте жақсы қарсылас. Біз жеңіс үшін барымызды салатын боламыз. Олай болмаған жағдайда алаңға шығудың да қажеті жоқ деп ойлаймын. Дәл қазір ойын туралы айту ерте. Себебі, матчқа екі айдан астам уақыт бар.

- Португалдық командаға қарсы кездесу 15 ақпан күні өтетінін ескерсек, команда ойынға дайындалып үлгере ме?

- Біз бұл кездесуге барынша дайындалып, ойынға барынша спорттық бабымызда келуге тырысамыз. Біз дәл қазір аздап демалып, кейін жаңа маусымға дайындықты бастаймыз. Ал ойын болатын уақытта Португалиядағы футбол маусымы нағыз қызған шағында боларын ескерсек, қарсыласта аздаған басымдықтың болары анық. Дегенмен, біз бапкерлер құрамымен бірге осы ойынға тыңғылықты дайындалып, «Спортингке» қарсы кездесуде нәтижелі ойын көрсету үшін барымызды салатын боламыз. Біз кез келген жағдайда клубымыздың және еліміздің абыройы үшін барымызды саламыз!

Әлеуметтік желілерде бөлісу