Бундеслига тарихындағы ең жас бапкер "Реалды" жаттықтырудан бас тартты

Фото: Yahoo Sports

Германияның "Хоффенхайм" футбол клубының бас бапкері Юлиан Нагельсманн мадридтік "Реалды" жаттықтырудан бас тартты, - деп хабарлайды Marca басылымы.

"Корольдік клубты" осыған дейін Зиннедин Зидан жаттықтырып келген еді. Ол қызметінен кетісімен клуб басшылығы жаңа жаттықтырушы іздей бастады. Юлианға ұсыныс жібергенмен, бундеслига тарихындағы ең жас маман испандық ұжымға келісімін бермеген. Ол "Хоффенхайммен" ұзақ уақытқа келісімге келген. Өзге командалар ұсынысын 2019/2020 жылдан бастап қана қарастыра алатын көрінеді.

30 жастағы бапкер "Хоффенхаймды" 2016 жылдан бері жаттықтырып келеді. Биылғы маусымда команда бундеслигада үшінші орын алды. Кей бұқаралық ақпарат құралдары хабарлағандай, Юлиан Нагельсманнға "Бавария", "Боруссия д" және "Арсенал" клубтары қызығушылық танытқан.

Юлиан Нагельсманн 2016 жылы "Хоффенхайммен" келісімшартқа қол қойғанда 28 жаста болған. Нәтижесінде бундеслига тарихындағы ең жас жаттықтырушы атанған болатын.

Айта кетейік, "Реал" тізгінін "Тоттенхэм" клубының бапкері Маурисио Почеттино ұстауы мүмкін деген де хабарлар тарауда.

Әлеуметтік желілерде бөлісу