Месси Гризманға қоңырау шалып "Барселонаға" өтуін сұрады

Месси мен Гризманн. © butfootballclub.fr

"Барселона" шабуылшысы Лионель Месси мадридтік "Атлетико" сапында өнер көрсетіп жүрген Антуан Гризманның өз клубына ауысуына ықпал етуде.

AS басылымының мәліметінше, Месси Гризманға қоңырау шалып, каталониялық клубқа ауысуын сұрап, осы командадағы көшбасшылар оның келуін қуанышпен қарсы алатынын уәде еткен. Осының нәтижесінде Гризманн "Барселонаға" ауысуды ойлап отырған көрінеді.
Еуропа лигасын жеңгеннен кейін "Атлетико" басшылығы француздық футболшы клубта қалуын өтінген, сол себепті ол басқа клубқа ауысу идеясын бір сәтке ысырып қойған еді. Әлем біріншілігі басталғанға дейін нақты бір шешім шығуы тиіс.

Sport.es мәліметінше Гризманн "Барселона" клубымен бесжылдық келісімшарт жасасады. Оның жалақысы жылына 15 миллион еуро және қосымша бонустар болады. Каталониялық клуб өкілдері Гризманның әпкесі әрі агентімен келіссөздер жүргізіп жатыр.

Егер осы келісімшарт іске асатын болса, онда Гризманн жылына ең көп жалақы алатын футболшылар тізімінде екінші болады. Бірінші орында Лионель Мессидің өзі тұр.

Гризманн осы маусымда "Атлетико" үшін әр түрлі жарыстарда 48 ойын өткізіп, 19 гол салып, мадридтік командаға Еуропа лигасын жеңуге септігін тигізді.

Әлеуметтік желілерде бөлісу