Golden Boy "Канелоның" келесі қарсыласы болуы мүмкін деген боксшылардың тізімін жариялады

Сауль "Канело" Альварестің (49-1-2, 34 КО) жекпе-жектерін ұйымдастыратын Golden Boy Promotions промоутерлік компаниясы мексикалық боксшының қыркүйек айындағы жекпе-жегінде қарсылас болуы мүмкін деген боксшылардың тізімін жариялады. Бұл туралы Boxingnews24.com порталы хабарлап отыр. 

Қазіргі уақытта "Канело" ақпан айында кленбутерол дәруменімен ұсталып қалғаннан кейінгі алты айлық жаза мерзімін өтеп жатыр. Сол екі бірдей допинг сынағының оң болуына да байланысты ол 5 мамыр күнінен белгіленген орта салмақтағы WBA (Super), IBO, WBC және IBF тұжырымдары бойынша әлем чемпионы Геннадий Головкинмен (38-0-1, 34 КО) өтуі керек болған екінші кездесуден бас тартқан болатын. 

Мексикалық боксшының жаза мерзімі тамыз айында аяқталады. Ал оның келесі кездесуі 15 қыркүйек күні Лас-Вегас қаласында өтеді деп жоспарланып отыр. "Канелоның" бұл кездесудегі қарсыласы Головкин болады деп айтылған болатын. Бірақ келіссөздер қазіргі уақытта тоқтап қалған екен. Оған себеп боксшылардың командасы табысты бөлісе алмауы. 

Альварестің қыркүйек айындағы кездесуінде қарсыласы болуы мүмкін деген бес боксшы: 

- ирландиялық Гэри "Спайк" О'Салливан (28-2, 20 KO) және канадалық Давид Лемье (39-4, 33 KO). Бұл екі боксшының да жекпе-жектерін Golden Boy Promotions ұйымдастырады;

- орта салмақтағы әлемнің бұрынғы чемпионы америкалық Дэниэл Джейкобс (34-2, 29 KO);

- орта салмақтағы WBO белбеуінің иегері британдық Билли Джо Сондерс (26-0, 12 КО);

- орта салмақтағы WBC белбеуінің уақытша чемпионы америкалық Джермалл Чарло (27-0, 21 KO). Ол Головкиннің міндетті қарсыласы.

Айта кетейік, бұл тізімдегі Лемье мен Джейкобс Головкинмен кездескен. Тарқатып айтсақ, канадалық боксшы 2015 жылы отандасымызбен кездесіп, сегізінші раундта жеңіліп, IBF белбеуінен айырылып қалды. Ал америкалық боксшы 2017 жылы кездесіп, 12 раундтың қорытындысы бойынша жеңілді. 

Өз кезегінде Головкиннің промоутері Том Леффлер егер Альвареспен келіссөз аяқталмаса, қазақстандық боксшы өзінің міндетті қарсыласы украиналық Сергей Деревянченкомен (12-0, 10 КО) кездесетінін айтты. Бірақ Леффлер Головкиннің Сондреспен кездеспейтінін айтты.