Давид Лемьенің қатысуымен өтетін бокс кешінде жұдырықтасатын Батыр Жүкембаевтың қарсыласы анықталды

karljessy.com

26 мамыр күні Канаданың Квебек қаласында шаршы алаңға шығатын қазақстандық боксшы Батыр Жүкембаевтың қарсыласы анықталды, деп хабарлайды Vesti.kz порталы.

Отандасымыздың келесі қарсыласы 23 жастағы аргетиналық Джонатан Хосе Энис болады. Ол кәсіпқой бокста 30 кездесу өткізіп, 20 кездесуде жеңіске жетсе, 9 кездесуде жеңіліп, бір кездесуде қарсыласымен тең түскен. Өзінің соңғы кездесуін Энис 16 наурыз күні өткізіп, төрешілердің шешімі бойынша жеңіске жеткен.

Ал 27 жастағы Жүкембаев үшін бұл кәсіпқой бокстағы 13 кездесуі болмақ. Бұған дейінгі 12 кездесуінде отандасымыз жеңіске жеткен. Оның 10 кездесуін нокаутпен аяқтаған. Жүкембаев соңғы кездесуін 31 наурыз күні мексикалық Ноэ Нуньеске қарсы өткізіп, қарсыласы 35 секундтың ішінде сұлатып салды.

Бұл кездесу орта салмақтағы IBF белбеуінің бұрынғы иегері канадалық Давид Лемьенің бокс кешінде өтеді. Канадалық боксшының қарсыласы франциялық Карим Акур болады.

Айта кетейік, бұл бокс кешінде тағы бір отандасымыз Абылайхан Құсайынов та өнер көрсетуді жоспарлап отыр.

Әлеуметтік желілерде бөлісу