О'Салливан да Головкинмен жұдырықтаспайтын болды

Golden Boy Promotions©

Ирландиялық кәсіпқой боксшы Гэри О'Салливан 5-мамыр күні қазақстандық Геннадий Головкинге қарсы жұдырықтаспайтын болды. Бұл туралы Boxingnews24.com порталына Golden Boy Promotions президенті Эрик Гомес айтып берді.

Оның айтуынша, ирландиялық боксшының командасы жекпе-жекке дайындалуға аз уақыт қалғанына байланысты келісім беруден бас тартыпты. Басылым сондай-ақ О'Салливан 4-мамыр күні Лос-Анджелестегі StubHub Center спорт кешенінде өнер көрсетінін жазады. Бірақ 5-мамыр күні дәл осы спорт кешенінде өнер көрсететін Головкинге қарсы емес.

Еске салайық, 5-мамыр күні Головкин кәсіпқой бокстағы 39 жекпе-жегін өткізуі тиіс. Әу баста қазақстандық боксшының қарсыласы Сауль "Канело" Альварес болуы керек еді. Бірақ 3-сәуірден 4-сәуірге ауысқан түні мексикалық боксшының бас тартуына байланысты, жекпе-жек өтпейтін болды.

Содан соң сөз кезегін Головкин алып, бәрібір 5-мамыр күні жұдырықтасуға ниетті екенін айтты. Алдағы кездесудің өтетін орны ретінде Лас-Вегастағы MGM Grand таңдалды. Мұны комиссия да қолдады. Бірақ осы аптаның басында жекпе-жек Лас-Вегастан Лос-Анджелеске ауысуы мүмкін екені анықталды.

Бұл кездесуде Головкиннің қарсыласы әлі анықталған жоқ. Дегенмен де отандысымыздың қарсыласы украиналық Сергей Деревянченко немесе ирландиялық Гэри О'Салливан болуы мүмкін екені жазылған.

Отандасымыздың промоутері Том Леффлердің айтуынша, Головкинмен кездесуге ниетті боксшылар көп. Нақтырақ айтсақ, олар қазір бес боксшымен келіссөз жүргізіп жатыр екен.

Әлеуметтік желілерде бөлісу