Егер мен допинг сынақты тапсырмасам, жанкүйерлер мені жеп қоятын еді - Жақиянов Барнеттпен болған жанжалға қатысты пікірін білдірді

Reuters©

Қазақстандық кәсіпқой боксшы Жанат Жақиянов Zakon.kz порталына берген сұқбатында британдық боксшы Райан Барнеттке қарсы өткізген жекпе-жектен кейінгі допинг дауына байланысты пікір білдірді.

"Әдетте жекпе-жектен кейін допинг офицерлері спортшының қасынан кетпей, допинг сынақ тапсыруды міндеттейді. Мен екі сағаттың ішінде тапсырылуы керек барлық анализді өткіздім. Барнетті емханаға алып кетті. Біз оны текст тапсыратын шығар деп күтіп отырдық. Бірақ ол кетіп қалды. Кейін оның мүлде сынақ тапсырмағаны белгілі болды. Менің промоутерім бұл жағдайды бұлай қалдырмайтынын айтты. Ойлап көріңіздерші, егер мен сынақ тапсырмасам не болатын еді? Мен жанкүйерлер жеп қоятын еді ғой. Ал оны қорғаштап, барлығы соның сөзін сөйлеп жатыр", - дейді Жақиянов.

Жеңіл салмақта WBA және IBF белбеулерін біріктірген жекпе-жек 21 қазан күні Барнеттің туған қаласы Белфестте өткен болатын. 12 раундтың қорытындысы бойынша төрешілер жеңісті британдық боксшыға берді. Осылайша Барнетт IBF белбеуін сәтті қорғап, Жақияновтың WBA (Super) белбеуіне ие болды.

Жекпе-жектен кейін екі боксшы да міндеттелген допинг сынақтан өтуі керек болатын. Жақиянов сынаманы тапсырса, Барнетт келмеген. Оған себеп британдық боксшының емханаға кетуі болған. Осы жағдайға байланысты Жақияновтың командасы WBA және IBF ұйымдарына шағым білдірді. Бірақ бұл шағымды ешкім де қарастырмады.

Әлеуметтік желілерде бөлісу