Қазақстандық боксшы АҚШ жерінде WBC ұйымының чемпиондық белбеуі үшін жекпе-жек өткізеді

Кәсіпқой бокста жеңілістің кермек дәмін татпаған 21 жастағы қазақстандық боксшы Әли Ахмедов Vesti.kz порталының тілшісіне АҚШ жерінде WBC ұйымының чемпиондық белбеуіне таласатыны туралы айтып берді.

- Маусым айының соңынла АҚШ жерінде чемпиондық жекпе-жек өткіземін. WBC ұйымы маған NABF белбеуі үшін жекпе-жек өткізуді ұсынды. Қарсыласымды ұйымның өздері таңдайды. Бұл менің Америка жеріндегі бірінші жекпе-жегім және бірден белбеуге таласатын болдым. Өзімді жақсы қырымнан көрсеткім келеді. Мен бұл кездесуге өз келісімімді бердім. WBC жіберген келісімшартқа қол қойдым. Қазір жекпе-жекке дайындық жүргізіп жатырмын.

- Дайындығыңыз қалай өтіп жатыр?

- Бұл кездесуге дайындықты Алматы қаласында бастадым. Бірақ дайындықтың негізгі кезеңі 15 маусым күні Лас-Вегастағы Флойд Мейвезердің залында өтеді. Ол жерде екі спарринг өткіземін. Дайындықтардың барлығын жеке бапкерім Сағатбек Мұсахановпен өткізіп жатырмын. 28 маусым күні Миннеаполиске жол тартамыз. 29 маусым күні салмақ өлшеу рәсімі. Ал келесі күні жекпе-жек.

- NABF белбеуі негізі украиналық боксшы Александр Гвоздикке тиесілі еді ғой ...

- Иә, бұл белбеу Гвоздикке тиесілі болған. Бірақ қазір бұл белбеу бос тұр.

Еске салайық, жартылау ауыр салмақта сынға түсетін Әли Ахметов осы уақытқа дейін кәсіпқой бокстағы алты кездесу өткізіп, барлығында жеңіске жетті.

Әлеуметтік желілерде бөлісу